Венецуела го обвини Доналд Трамп за колонијалистичка закана откако тој кажа дека воздушниот простор над и околу земјата е целосно затворен.

„Коментарите на Трамп се уште една екстравагантна, нелегална и неоправдана агресија против венецуелскиот народ. САД немаат законско овластување да го затворат воздушниот простор на друга земја“, кажа министерството за надворешни работи на Венецуела.

САД со месеци напаѓаат бродови кои наводно превезуваат дрога, а американската војска го зголеми своето присуство во Карибите. Трамп притоа дозволи тајни операции на ЦИА во Венецуела и најави дека САД многу скоро ќе почнат копнени операции во земјата за да се сопрат венецуелските наркокартели.

Администрацијата на Трамп го обвини венецуелскиот лидер Николас Мадуро за вмешаност во трговија со дрога, што тој го негира. Мадуро смета дека Трамп се обидува да го собори откако САД го распоредија најголемиот носач на авиони во светот „Џералд Форд“ со околу 15.000 војници на растојание од кое може да се нападне Венецуела.

Во септември, Мадуро најави мобилизација на осум милиони граѓани за да се заштити суверенитетот на Венецуела, велејќи дека околу 4,5 милиони луѓе веќе поминале обука.