Двајца американски функционери потврдија дека американски противвоздушен систем „патриот“ бил оштетен во вчерашното руско ракетирање на Киев, но се чини дека не е уништен. „Патриот“ е најнапредниот одбранбен систем што Украина го има добиено од западот од почетокот на војната.

Еден функционер, кој побара да остана анонимен, изјави дека Вашингтон и Киев веќе разговараат за начините за поправка на системот и во овој момент немало потреба од неговото носење надвор од Украина.

„Во следните денови ќе имаме појасна ситуација и повеќе информации“, рекол тој.

„Патриот“ се смета за еден од најнапредните американски противвоздушни системи, кој е способен да соборува авиони и крстосувачки и балистички проектили. Тој доаѓа со лансер, радар и други придружни возила и за разлика од другите вакви системи, не е мобилен, туку е стациониран во едно место.

Руското министерство за одбрана вчера соопшти дека уништиле „патриот“ со хиперсоничен проектил „кинжал“. Украина кажа дека во вчерашниот руски напад соборила 18 руски проектили, меѓу кои и шест „кинжали“.

Украина досега има добиено два система „патриот“, еден од САД, а другиот заеднички го донираа Германија и Холандија. Овој систем има моќен радар за детектирање проектили на голема далечина, но радарската емисија истовремено му овозможува на непријателот да ја лоцира батеријата на „патриот“.