Судот во Денвер ѝ додели 3,76 милиони долари отштета на 78-годишна жена откако полицијата упаднала во нејзиниот дом следејќи лажна дојава преку апликацијата „Најди го мојот ајфон“ за украдена стока. Руби Џонсон била принудена да излезе од домот и да чека во полициски автомобил облечена само во бањарка.

Поротата утврдила дека упадот што се случил на 4 јануари 2022 бил без веројатна причина и ги прекршил нејзините уставни права.

Полицијата на Денвер издала налог за претрес ден откако камион бил украден од хотелски паркинг. Сопственикот на возилото, кој престојувал во хотелот, ѝ рекол на полицијата дека во камионот има шест огнени оружја, два дрона, 4.000 долари во готовина и стар „ајфон 11“. Тој исто така рекол дека со помош на апликацијата „Најди го мојот ајфон“ го лоцирал телефонот близу домот на Џонсон. Врз основа на ова бил издаден налог за претрес.

Американската унија за граѓански слободи на Колорадо (АЦЛУ), која ја покрена тужбата во името на Џонсон, објави дека отштетата од 3,7 милиони долари е мал чекор кон правдата.

„Џонсон и нејзиниот дом и натаму имаат рани од тој ден кои не се целосно зацелени“, кажаа од Унијата.