Сириските безбедносни сили наводно убиле стотици припадници на верското малцинство алавити во насилствата кои траат на брегот на земјата, објави Сириската опсерваторија за човекови права (СОЧП). Таа вели дека се убиени повеќе од 700 цивили во 30-ина масакри, чија цел биле алавити, а стотици луѓе избегале од своите домови.

Сирискиот лидер Ахмед ал-Шара повика на мир денеска.

„Мора да ги зачуваме националното единство и домашниот мир. Можеме да живееме заедно. Она што моментално се случува во Сирија е во рамките на очекуваните предизвици“, изјави Шара.

Соборениот претседател Башар ал-Асад исто така му припаѓа на ова верско малцинство. Алавитите сочинуваат 10% од населението во Сирија и тие беа истакнати во режимот на Асад. Некои од нив одбија да го положат оружјето.

Според СОЧП, во изминатите два дена биле убиени повеќе од илјада луѓе, што се најголемите насилства од падот на режимот на Асад во декември. Овие бројки вклучуваат и стотици припадници на владините трупи и на силите лојални на Асад, кои од четвртокот водат борби во провинциите Латакија и Тартус. СОЧП вели дека масакрите на алавитите биле одмазда за нападите на силите лојални на Асад.