Новоизбраниот американски претседател Доналд Трамп по вторпат е прогласен за Личност на годината во традиционалниот избор на магазинот „Тајм“.

„Доналд Трамп е Личност на годината за 2024 откако изведе враќање од историски размери, поттикна политичко престројување што се случува еднаш во генерација, го преобликува американското претседателство и ја промени улогата на Америка во светот“, објави уредникот на „Тајм“, Сем Џејкобс.

Трамп првпат го доби ова признание во 2016, кога исто така победи на претседателските избори во САД. Тој го наследува овој епитет од поп-ѕвездата Тејлор Свифт, а во најтесната конкуренција биле и Камала Харис, Илон Маск и принцезата Кејт.

„Тајм“ ја почна оваа традиција во 1927 со цел да се оддаде признание на личности или движења кои на добар или лош начин имале најголемо влијание во светот таа година.