САД лансираа „прецизни и моќни“ воздушни напади врз хутските бунтовници во Јемен, објави Доналд Трамп, а како причина за тоа ги наведе нападите на групата врз бродовите во Црвеното Море.

„Финансирани од Иран, хутските насилници ракетираа американски авион и ги напаѓаа нашите трупи и сојузници. Пиратството, насилството и тероризмот чинеа милијарди долари и ставија животи во ризик“, кажа Трамп.

Министерството за здравство водено од хутите соопшти дека во нападите загинале 31 лице, а над 100 се повредени. Групата се закани дека ќе се одмазди за американските напади.

Хутите, кои се непријатели на Израел, пријавија серија експлозии во Сана и во северната провинција Сада, нивното упориште близу границата со Саудиска Арабија. Од почетокот на војната во Газа, тие напаѓаа бродови во Црвеното Море, тврдејќи дека целта се само оние поврзани со Израел, САД или Велика Британија.

„Нападите на хутите нема да се толерираат. Ќе употребиме огромна смртоносна сила додека не ја постигнеме нашата цел“, рече Трамп.