Доналд Трамп не ја исклучува можноста за воена или економска акција во рамките на неговите желби САД да ја преземат контролата врз Панамскиот Канал и данската автономна територија Гренланд.

Запрашан на прес-конферецнија дали може да го увери светот дека нема да користи воена или економска принуда додека се обидува да ја добие контролата врз Панамскиот Канал и Гренланд, Трамп рече:

„Не, не можам да ве уверам за ниту едно од тие две. Но, можам да го кажам ова, тие ни се потребни за економска безбедност“.

На две недели пред враќањето во Белата куќа, Трамп сѐ погласно ја истакнува својата експанзионистичка агенда. Тој исто така изрази желба да ја претвори Канада во американска сојузна држава и ги критикуваше американското трошење на канадски производи и воената поддршка за Канада.

Тој најави дека би можел да воведе царини за Данска ако биде одбиена неговата понуда да го купи Гренланд, за кој кажа дека е од витално значење за националната безбедност на САД. Данска кажа дека Гренланд не е на продажба.

Минатиот месец, Трамп побара од Панама да ги намали таксите за Панамскиот Канал или да го врати под контрола на САД, обвинувајќи ја централноамериканската земја дека им наплаќа превисоки цени на американските бродови. Каналот до 1977 беше под контрола на САД, по што постепено ѝ се враќаше на Панама. Од 1999 таа има целосна контрола врз него.

Трамп исто така вети дека ќе го промени името на Мексиканскиот Залив во Американски Залив.

„Тој зафаќа голема територија. Американски Залив, колку прекрасно име“, кажа тој.

МОЖЕБИ ЌЕ ВЕ ИНТЕРЕСИРА И ОВА:

СЛЕДЕТЕ ГО НАШИОТ ОФИЦИЈАЛЕН ЈУТЈУБ КАНАЛ