Доналд Трамп одби да каже дали САД се соочуваат со рецесија или покачување на цените по последните закани со царини кон своите најголеми трговски партнери. Запрашан дали САД би можеле да паднат во рецесија оваа година, Трамп одговори:

„Не сакам да предвидувам такви работи. Сега сме во период на транзиција зашто она што го правиме е големо. Го враќаме богатството назад во Америка. Тоа е голема работа. Треба време, но мислам дека ќе биде одлично за нас“, изјави Трамп.

Министерот за трговија Хауард Латник инсистираше дека нема да има контракција во најголемата светска економија, но би можело да има поскапувања на некои производи.

Денеска на сила стапија новите кинески царини од 10% до 15% за САД, кои главно се однесуваат на земјоделските и сточарските производи и се одговор на царините од 20% што ги воведе Доналд Трамп на целиот увоз од Кина.

Минатата недела, Трамп воведе нови царини од 25% за Канада и Мексико, но по само два дена го одложи нивното применување за повеќето предвидени производи.