Кина и Европска Унија најавија решителни контрамерки откако Доналд Трамп воведе нови царини на целиот увоз во САД, задавајќи и го најголемиот удар на меѓународната трговија по Втората светска војна. Неговиот план предвидува основна, најниска царина од 10 отсто, но производите од 60-ина трговски партнери, кои Белата куќа ги нарече најголеми престапници, како Кина и ЕУ, се соочуваат со поголеми давачки како „отплата за досегашните нефер трговски практики“, кажа Трамп.
Аналатичарите велат дека засилувањето на трговската војна ќе доведе до поскапувања и успорен раст во САД, а некои држави низ светот би можеле да паднат во рецесија. Сепак, Белата куќа вчера кажа дека царините се неопходни зашто државите ги искористуваа САД со наметнувањето високи царини и други трговски ограничувања.
Прогласувајќи национална вонредна состојба, Трамп кажа дека Америка повеќе од пет децении „била ограбувана и силувана од блиски и далечни народи, и од пријатели и од непријатели“.
„Ова е прогласување на нашата економска независност. Денеска конечно ја ставаме Америка на прво место. Ова, според мене, е еден од најважните денови во историјата на САД“, рече тој.
Белата куќа појасни дека новите царини од 10% ќе почнат да се наплатуваат од 5 април, а повисоките царини за одредени држави на 9 април. Според канцеларијата за буџет во американскиот Конгрес, со новите царини би можеле да се соберат 2,2 трилиони долари до 2034 година.
Новите промени во царинењето засега нема да се однесуваат на Канада и Мексико, но Трамп воведе царини од 10% за Велика Британија, 20% за Европска Унија, 24% за Јапонија и 25% за Индија. Предвидени се и нови царини од 34% за Кина, покрај веќе постоечките од 20%, со што тие ќе се зголемат на 54%.
„Мојот совет до сите држави е засега да не се одмаздуваат. Седете мирни, прифатете го ова, па ќе видиме како ќе биде. Ако се одмаздите, ќе има ескалација“, предупреди американскиот министер за финансии Скот Бесент.
Претседателката на Европската комисија Урсула фон дер Лајен кажа дека Брисел го финализира првиот пакет мерки како одговор на првите царини за алуминиум и подготвува дополнителни контрамерки ако преговорите не успеат.
„Царините се голем удар за светската економија и последиците ќе бидат страшни за милиони луѓе“, рече Фон дер Лајен ноќеска.
Кинеското министерство за трговија ги повика САД „веднаш да ги отповикаат овие еднострани царински мерки и да ги решат трговските спорови преку рамноправен дијалог со своите партнери“.
„Кина цврсто се противи на овој потег и ќе преземе решителни контрамерки за да ги заштити своите права и интереси“, рече портпаролот.
