Доналд Трамп објави дека нема да воведе нови царини за осум европски сојузници, што требаше да стапи во сила на 1 февруари. Оваа мерка се однесуваше на Велика Британија, Франција, Германија, Холандија, Данска, Шведска, Норвешка и Финска, кои отворено се спротивставија на неговите амбиции за преземање на Гренланд.

„По многу продуктивен состанок со генералниот секретар на НАТО, Марк Руте, тие ја формираа рамката за иден договор во однос на Гренланд. Ова решение, доколку се постигне, ќе биде одлично за Соединетите Американски Држави и за сите членки на НАТО. Врз основа на ова разбирање, нема да ги воведам царините што требаше да стапат во сила на 1 февруари. Се водат дополнителни дискусии во врска со ‘Златната купола‘ и Гренланд“, напиша Трамп на својата социјална мрежа по учеството на Светскиот економски форум во Давос.

Тој таму ги повтори своите амбиции за американско преземање на Гренланд, барајќи веднаш да почнат преговори, но рече дека нема да користи сила за да го оствари тоа.

„Гренланд е огромна, речиси ненаселена и неразвиена земја која седи незаштитена. Таму нема ретки земјени елементи. Она што е важно е неговата стратешка национална безбедност и меѓународната безбедност. Барам веднаш да почнеме преговори за преземање на Гренланд. Американските претседатели речиси два века бараат да го купат Гренланд. Само САД можат да го заштитат, развијат и унапредат“, рече Трамп во својот говор во Давос.