Раководителот на Центарот „Кенеди“ во Вашингтон побара 1 милион долари отштета од музичарот кој го откажа концертот откако името на претседателот Доналд Трамп беше додадено на објектот. Чак Ред го откажа својот настап на Бадник, кој го води секоја година од 2006, наведувајќи го гласањето на одборот за преименување на објектот во Центар „Трамп Кенеди“.
Во своето писмо, раководителот на одборот Ричард Гренел рече дека откажувањето е „политички трик“ и „значително нè чинеше“. Ред не одговори веднаш на барањето за коментар.
Кратко по преземањето на функцијата, Трамп отпушти неколку од членовите на Одборот и ги замени со сојузници, кои потоа гласаа Трамп да биде претседател на Одборот.
Гренел, претседателот на Центарот „Трамп Кенеди“, напиша во писмото до Ред дека неговото отсуство „е класична нетолеранција и многу скапо за непрофитна уметничка институција“. Тој додаде: „Вашата лоша продажба на билети и недостатокот на поддршка од донатори, во комбинација со вашето откажување во последен момент, нè чинеа значително. Ова е вашето официјално известување дека ќе бараме 1 милион долари отштета од вас за овој политички трик“.
Минатата недела, Белата куќа објави дека Одборот на Центарот едногласно гласал за преименување на културната институција во Меморијален центар за сценски уметности „Доналд Џ. Трамп и Џон Ф. Кенеди“. Еден ден подоцна, можеше да се види како екипи го поставуваат името на претседателот Трамп на фасадата на зградата. Веб-страница и некои профили на социјалните мрежи исто така беа преименувани.
Белата куќа соопшти дека преименувањето е во знак на признание за активностите на Трамп за реновирање на зградата, но потегот беше критикуван од демократите, неколку уметници и членови на семејството Кенеди.
„Кога ја видов промената на името на веб-страницата на Центарот ‘Кенеди’, а потоа и неколку часа подоцна на зградата, решив да го откажам нашиот концерт“, изјави Ред, тапанар и вибрафонист кој бил на турнеи со сите, од Дизи Гилеспи до Реј Браун, и го води празничниот „Џез џемс“ во Центарот „Кенеди“ од 2006, наследувајќи го басистот Вилијам „Кетер“ Бетс.
Претседателот Кенеди беше убиен во 1963, а Конгресот следната година донесе закон со кој центарот беше именуван како жив споменик во негова чест. Внуката на Кенеди, Кери Кенеди, вети дека ќе го отстрани името на Трамп од зградата откако тој ќе ја напушти функцијата, а поранешниот историчар на Претставничкиот дом, Реј Смок, е меѓу оние кои велат дека сите промени ќе мора да бидат одобрени од Конгресот.
Законот експлицитно му забранува на одборот на доверители да го претвори центарот во споменик на некој друг и да стави име на друго лице на надворешноста на зградата.
