Руските државни медиуми и провоени блогери објавија дека руските трупи ја повратија контролата врз Суџа, најголемиот град во рускиот регион Курск што беше заземен во изненадувачката офанзива на украинските сили минатото лето.

Телеграм канал поврзан со руските воздушни трупи објави кратко видео на кое се гледа руско знаме на централниот плоштад во Суџа, а потоа тоа се најде и на сајтовите на државните медиуми „ТАСС“ и „РИА новости“.

Руските сили ослободија повеќе населени места во Курск во изминатите денови откако брзо напредуваа во својата противофанзива. Независниот воен аналитичар Јан Матвеев смета дека Украинците се повлекле од Суџа без борба со цел да спасат војници и опрема. Тој смета дека Русите ќе ја преземат контролата врз целиот регион Курск до крајот на денот.

„Украинците постепено се повлекуваат од Курск. Видовме како сите области паѓаат под контрола на руските сили со малку или без отпор. Истото важи и за Суџа. Нема никакви снимки од борби. Во овој момент може да се каже дека целиот град Суџа е под контрола на Русија. Украинските сили би можеле да се обидат да задржат некои погранични села уште неколку дена“, изјави воениот аналитичар Руслан Левиев.

Украина ги изненади Русија и светската јавност кога август покрена офанзива во рускиот регион Курск и за кратко време зазеде територија од 1.370 квадратни километри и околу сто населени места. Киев сметаше дека на овој начин ќе го растовари фронтот во источна Украина зашто Русија ќе мора да префрли сили оттаму, а освоената територија би служела за размена во иднина.

Русија ја засили својата противофанзива во изминатите денови и имаше извештаи дека украинските сили во Курск се во опасност да бидат опколени. Шефот на украинската војска Олександр Сирски го демантираше ова, но призна дека се повлекуваат. До денеска, Украина држела само уште 200 квадратни километри од Курск, според украинскиот воен блогер Дипстејт.