Владата на Доналд Трамп започна да отпушта стотици вработени во Федералната управа за воздухопловство (ФАА), неколку недели по фаталната несреќа близу аеродромот во Вашингтон, кога во воздух се судрија патнички авион и воен хеликоптер.

Според синдикатот на специјалисти за безбедност во авиосообраќајот (ПАСС), стотици пробни службеници на агенцијата, од кои повеќето биле на работа помалку од една година, почнале да примаат откази преку електронска пошта од петокот. Ова е дел од политиката на кратење трошоци што ја води Одделот за владина ефикасност на Илон Маск, чија цел е драстично намалување на бројот на федералните работници.

Шефот на ПАСС, Алекс Спиро, кажа дека отпуштањата се срамни и ќе го зголемат обемот на работа и ќе ѝ наметнат нови одговорности на работната сила, која и онака е веќе тенка. Спиро додаде дека отказите опфатија специјалисти за системи, инспектори за безбедност, механичари за одржување и административен кадар.

„ФАА веќе се соочуваше со недоволно персонал и одлуката за намалување на персоналот е несовесна по три смртоносни авионски несреќи во изминатиот месец“, изјави Спиро.

Џејсон Кинг, кој се најде меѓу отпуштените, изрази загриженост како оваа одлука ќе се одрази врз безбедноста на авиосообраќајот.

„Се отпуштаат луѓе кои се директно вклучени во безбедноста на авиосообраќајот, што ја загрозува безбедноста во нашиот национален воздушен простор“, кажа Кинг.

Владата на Трамп им нареди на владините агенции да ги отпуштат речиси сите пробни работници, што би можело да погоди стотици илјади луѓе.