Шведскиот бизнисмен и крајнодесничарски политичар Карл Лундстрем загина во авионска несреќа во Словенија. Шеесет и четиригодишниот Лундстрем беше најпознат како косопственик на пиратската веб-страница „Пајрет беј“ (The Pirate Bay), поради што своевремено беше осуден на затвор и добиваше парични казни.
Тој загина кога неговиот мал авион се урна во куќа на Велика Планина во Словенија. Авионот полетал од Загреб и патувал за Швајцарија. Лундстрем самиот управувал со авионот, во кој немало други патници.
Лундстрем во Шведска беше познат и како бизнисмен и како политичар, а во 2000-тите го покренал „Пајрет беј“, кој стана еден од најкористените сајтови за пиратерија на светот. Во 2009 беше осуден на една година затвор поради прекршување на законот за авторски права, а неговиот долг за отштети подоцна порасна на 86 милиони шведски круни, но и покрај тоа, „Пајрет беј“ продолжи со работа до денес.
Лундстрем емигрирал во Швајцарија во 2008, а во последните години живеел и во Хрватска.
Тој исто така долго време бил дел од антиимиграциските и крајнодесничарски кругови во Шведска. Во 1980-тите бил припадник на расистичка организација, а во последните години беше член на десничарската партија Алтернатива за Шведска, која ја потврди неговата смрт.
