Полицијата на босанските Срби вчера протера висока функционерка на германското Министерство за надворешни работи од Република Српска (РС), српскиот ентитет во Босна и Херцеговина, по состанокот со опозициските групи. Германската државна секретарка за европски прашања Ана Лирман е протерана како одмазда за германските санкции против раководството на босанските Срби. Лирман изјави дека претставниците на лидерот на РС, Милорад Додик, ѝ се заканувале со „насилство“ во главниот град на ентитетот, Бања Лука.
Во објава на социјалните мрежи, Лирман напиша дека Додик „повторно го покажа своето деструктивно однесување“.
„Неговите претставници ни се закануваа на мене и на мојата делегација со насилство“, додаде таа.
Лирман вчера мораше да ги откаже сите состаноци и ја напушти Бања Лука под полициска придружба, јави босанската национална телевизија. Властите на босанските Срби ја прогласија Лирман за „персона нон грата“ како дел од, како што рекоа, „реципрочните мерки“ по германските санкции.
„Очекувам полицијата многу брзо и засекогаш да ја испрати од Република Српска“, напиша Додик на социјалните мрежи.
Во четвртокот во Сараево, Лирман и австриската министерка за надворешни работи Беате Рајзингер најавија санкции кои предвидуваат забрана за влез во Германија и во Австрија за лидерот на босанските Срби и неговите двајца најблиски соработници, обвинувајќи го Додик за напад врз уставниот поредок на БиХ и за загрозуување на безбедноста на земјата и на регионот. Додик предизвика уставна криза пркосејќи им на одлуките на меѓународниот претставник за БиХ, Кристијан Шмит, задолжен да ја спречи мултиетничката балканска држава да се врати во конфликт. Ова ескалираше во правен и политички конфликт во кој Додик и неговите сојузници, Русија и Србија, ги спротивстави со САД и Европската Унија.
Германското Министерство за надворешни работи вчеравечер соопшти дека претседателот на Република Српска Милорад Додик нема законско овластување да прогласи некого за „непожелна личност“ односно „персона нон грата“.
„Република Српска не е независна држава“, соопшти МНР на Германија.
Од крајот на меѓуетничката војна во 1990-тите години, Босна и Херцеговина е поделена на две полуавтономни половини: Република Српска со српско мнозинство и Федерацијата на Босна и Херцеговина со бошњачко и хрватско мнозинство. Секој од нив има своја влада и парламент, со само слаби централни институции кои ја раководат со земјата со 3,5 милиони жители. Додик со години води кампања за поткопување на слабите централни институции на Босна, заканувајќи се со отцепување на српскиот ентитет.
