Италијанската премиерка Џорџа Мелони изјави дека е згрозена откако фотографии од неа и други жени се појавија на порнографски сајт, барајќи прекршителите веднаш да бидат идентификувани и казнети.

Фотографии од сестрата на Мелони, Аријана и од опозициската лидерка Ели Шлајн исто така беа откриени на платформата „Фика“ (Phica), која има повеќе од 700.000 претплатници. Сајтот вчера беше затворен од неговите менаџери, кои ги обвинија корисниците за неправилно користење на платформата.

Фотографиите, придружени со вулгарни и сексистички натписи, биле земени или од лични профили на социјалните мрежи или од јавни извори без согласност и изменети за да се зумираат делови од телото или да се прикажат жените во сексуални пози. Десетици жени поднеле жалби откако скандалот беше откриен оваа недела од неколку истакнати жени.

„Згрозена сум од она што се случи. Сакам да ја изразам мојата поддршка на сите жени кои биле навредени и злоупотребени. Очајно е што во 2025 година сè уште има такви кои сметаат дека е нормално и легитимно да се гази по достоинството на жената и да се таргетира со сексистички и вулгарни навреди, криејќи се зад анонимност или тастатура“, кажа Мелони.

Сајтот „Фика“ беше лансиран во 2005 и работел непречено, и покрај тоа што жени го пријавувале. Полицијата започна истрага откако добила официјални жалби од неколку политичарки од централно-левичарската Демократска партија.