Мигрант од Пакистан бил прегазен од воз рано утрово на пругата близу станицата Згрополци. Настанот кој се случил во 3:54 часот го потврди МВР.

Локомотивата која возела кон Гевгелија го прегазила несреќниот мигрант, кој, според машиновозачот, спиел на пругата. Со него во групата биле и три други лица, кои спиеле во шанецот покрај пругата и поминале без повреди.

„Повредениот имал скршеници и повреди на левата страна од телото, бил имобилизран и во тешка општа состојба префрлен во Општа болница во Велес“, информираше д-р Страхил Тодоров, портпарол на Здравствен дом Велес.

„Пациентот удрен од воз бил во тешка состојба, со бројни повреди. Бил реанимиран, но неуспешно, по што е констатирана смрт“, изјави д-р Весна Николовска-Неделкова, портпаролка на Општа болница Велес.

Железничкиот сообраќај на релацијата Велес-Гевгелија бил во прекин до 6:35 часот поради вршење увид. Во времето на големата бегалска криза 2015-2018, околу 40 мигранти беа прегазени на пругата Гевгелија-Скопје.

П. ПЕЧКОВ