Јапонската министерка за родова еднаквост Тамајо Марукава се придружи на групата конзервативни пратеници кои се спротивставија на законските измени што би им овозможиле на жените да си го задржат моминското презиме после мажењето.

Јапонија е една од ретките високоразвиени држави каде што е незаконски венчаните двојки да имаат различни презимиња. Граѓанскиот код воведен уште во 1896 година бара од венчаните двојки да имаат исто презиме и во 96% случаи, жената го зема презимето на сопругот.

Притисокот да се измени овој закон се прави веќе со години, бидејќи се смета за дискриминирачки. Тоа доживеа голем удар во 2015 година, кога уставниот суд пресуди дека барањето да се дели едно презиме не е спротивно на уставот.

„Моето спротивставување е лично уверување, што нема да влијае врз моите задолженија“, изјави Марукава.

Како и повеќето Јапонки, и Марукава го користи своето моминско презиме на работа, а презимето земено од сопругот во официјални документи.