Јорданските власти упаднаа во палатата на поранешниот престолонаследник принцот Хамза и уапсија двајца негови соработници, откако откриле наводен обид за државен удар против кралот Абдула.

Хамза бин Хусеин е полубрат на Абдула, кој му ја одзеде титулата престолонаследник пред 16 години. Тој објави видео во кое вели дека се наоѓа во домашен притвор и дека му било кажано да не контактира со никого. Во видеото што го објави Би-Би-Си, тој вели дека не бил дел од никаков странски заговор и актуелната власт во Јордан ја опиша како коруптивна.

„Добросостојбата на јорданскиот народ е ставена на второ место од владејачкиот систем, кој одлучи дека личните интереси, финансиските интереси и корупцијата се поважни од животот, достоинството и иднината на 10 милиони луѓе кои живеат овдека“, вели Хамза.

Војската претходно демантираше дека Хамза е ставен во домашен притвор, додека регионалните сили, како Египет и Саудиска Арабија, му изразија поддршка на кралот Абдула, кој беше сојузник на САД во борбата против ИСИС.

„Од нас беше побарано да запреме движења и активности кои имаа за цел да ги нарушат безбедноста и стабилноста на Јордан“, изјави шефот на армијата Јусеф Ахмед ал-Хунаит.

Абдула владее со кралството од смртта на неговиот татко Хусеин во 1999 година.