Рускиот милионер Павел Антов, кој се збогати од бизнисот со колбаси, е пронајден мртов во хотел во Индија, два дена откако негов пријател починал на истото патување. Тие биле во посета на источната држава Одиша, а Антов починал набргу по прославата на неговиот роденден.

Антов, кој беше и локален политичар, бил добро позната личност во Владимир, град источно од Москва. Тој летоска негираше дека ја критикувал војната во Украина.

Руските медиуми објавија дека 65-годишниот Антов паднал од прозорец во хотел во градот Рајагада, каде што во петокот починал и Владимир Буданов, кој бил дел од неговото друштво.

„Буданов беше пронајден мртов откако претрпел мозочен удар и неговиот пријател потоа станал депресивен, па и тој починал. Полицијата не пронајде криминални елементи во овие трагични настани“, изјави командирот на полицијата на Одиша.

Антов поседувал фабрика за производство на колбаси и „Форбс“ во 2019 го процени неговото богатство на 140 милиони долари. Тој имал важна улога во градското собрание на Владимир, а во јуни објави порака на Вотсап во која руското ракетирање на Киев го опиша како терор. Потоа ја избриша пораката и кажа дека ги поддржува Путин и војната во Украина.