Седум таблет-компјутери наменети за помош на глуви и наглуви лица наскоро ќе бидат поставени на повеќе точки во Скопје, како дел од пилот-проектот „Дигитален толкувачки сервис за глуви и наглуви” кој беше промовиран денеска во Националниот сојуз за глуви и наглуви лица. Таблетите за почеток ќе бидат поставени во институции на МВР, како во полицискита станица „Беко“ и во просториите во МТВ во Скопје, како и во Градската општа болница „8 Септември“ и на Клиничкиот центар „Мајка Тереза“.
Во пракса тоа ќе изгледа вака: глувото лице доаѓа, на пример, во болница, се упатува на шалтер за информации, каде вработените ќе бидат информирани за таблетот, и вработеното лице го упатува до таблетот кој е подвижен. Со еден клик на таблетот, лицето стапува во контакт со дигиталниот толкувач и потоа комуникацијата се одвива меѓу глувото лице и медицинското лице кои физички се еден до друг, и толкувачот од другата страната на уредот.
Проектот претставува надградба на веќе востановениот проект на Националниот сојуз од 2019, за формирање Кол-центар за глуви и наглуви којшто работи до денес, а преку кој сертифицирани толкувачи на знаковен јазик ги опслужуваат и одговараат на видео повиците, што претставува одговор на потребите и барањата на глувите и наглувите со кои комуницираат на знаковен јазик.
„Кога глувото лице има преживеано грабеж, семејно насилство и слично, тоа не може да го пријави самостојно во полиција или кај социјалниот работник. Тоа лице при таков инцидент е немоќно. Кога глувото дете не може да го слушне или разбере учителот, тоа останува беспомошно. Глувите лица во себе имаат многу гнев, кој не е решен. Ова е загрижувачко прашање, бидејќи фрустрираните глуви поединци ги исфрлаат своите фрустрации кон најблиските и колегите. Потребно ни е соодветно образование за глувите, прилагодување на образовниот процес каде што ќе се вклучат сите релевантни чинители, за да можеме точно да разбереме што треба да се промени и да најдеме начин како да продолжиме напред заедно со нив”, рече Лиза Велкоска, генерален секретар на Сојузот.
Претседателот на Сојзуот, Томица Стојановски кажа дека „Целта е да може да нѐ разберат другите и ние да можеме да ги разбереме нив при разговор, секако преку толкувачи на знаковен јазик, бидејќи без толкувач на знаковен јазик ние глувите не можеме да комуницираме и да се разбереме“.
Б. НЕСТОРОСКА
