Десетици мажи поднесоа групна тужба во која се наведува дека модната компанија „Аберкромби & Фич“ била соучесник во децениската шема за сексуална трговија со луѓе, спроведена од поранешниот извршен директор Мајкл Џефрис. Според тужбата поднесена во петокот пред федералниот суд во Њујорк, Мајкл Џефрис, кој ја водеше компанијата помеѓу 1992 и 2014, „ја искористил својата улога како извршен директор на ‘Аберкромби’ за да заведува атрактивни млади луѓе кои верувале дека Џефрис ќе ги вработи како Аберкромби модели“. Компанијата изјави дека нема да коментира за судските спорови што се во тек.
Во тужбата се наведува дека Џефрис водел обемна операција за сексуална трговија, присилувајќи и принудувајќи ги младите мажи на сексуални дејствија во замена за пари и ветувања за вработување. Во тужбата се вели дека, во низа случаи, еден манекен бил поканет на повеќе кастинг настани на „Аберкромби & Фич“ во Њујорк, Франција и Лондон, и бил сексуално злоставуван најмалку седум пати на овие настани. Наводно, манекенот бил наведен да верува дека овој процес „е од суштинско значење за да стане модел на ‘Аберкромби’“.
Се смета дека вкупниот број жртви надминува 100, се вели во тужбата, и „очекуваме повеќе мажи да се придружат по поднесувањето“, рече адвокатката Британи Хендерсон, партнерка на фирмата што ги застапува некои од тужителите.
„Сексуалната експлоатација не прави дискриминација врз основа на пол“, изјави Хендерсон. „Мажите се експлоатирани во манекенството и модната индустрија со децении. Движењето #MeToo запали пожар во нашата земја што ги охрабри оние кои преживеале да излезат и да бидат слушнати. Овој случај е најважен за проширување на движењето #MeToo меѓу половите во движење #WeToo и искоренување на сексуалната експлоатација во целата индустрија, почнувајќи од ‘Аберкромби & Фич’“.
Тужителите бараат судење со порота, како и казни и надомест на штета.
Тужбата, исто така, го именува долгогодишниот партнер на Џефрис, Метју Смит како обвинет, и се тврди дека тој сексуално напаѓал мажи заедно со Џефрис. Во тужбата со 21 кривично дело, девет се обвиненија против „Аберкромби & Фич“ во кои се тврди дека компанијата била свесна за злоупотребата на Џефрис и Смит и свесно замижувала на „неограничената“ сума пари што Џефрис ја повлекол од корпоративните сметки со цел да им плаќа на жртвите.
