Стравувањата од голем земјотрес ги натераа луѓето да бегаат од Санторини додека популарниот грчки остров и натаму го погодуваат потреси. Грчкиот премиер Кирјакос Мицотакис ги повика жителите да останат мирни по засилената сеизмичка активност во областа.

Националниот авиопревозник „Ејџијан“ објави дека го удвоил бројот на летовите од Атина до Санторини во следните два дена, а патничките оператори велат дека „новите летови биле распродадени во секунда“.

Траектните компании исто така кажаа дека воведуваат дополнителни линии поради зголемен интерес за билети.

Повеќе од 280 земјотреси биле регистрирани викендов низ грчките острови во регионот на Санторини, при што најсилните имале магнитуда од 4,9 степени според Рихтеровата скала. Некои тресења биле на длабочина од само два километра.

Грчките власти ги затворија школите до 7 февруари и испратија спасувачки тимови, специјални сили, шатори и дронови на Санторини, а поради стравувањата дека би можел да уследи силен земјотрес, а со тоа и цунами, луѓето се советуваат да ги избегнуваат крајбрежјето и напуштените згради, да ги испразнат базените и да не се собираат во голем број во затворени простори.

Иако е малку веројатно дека неодамнешните потреси се претходник на вулканска ерупција, експертите велат дека оваа можност не може да се исклучи.