Неколку илјади приврзаници на бугарската ултранационалистичка партија Преродба денеска се пресметаа со полицијата додека се обидуваа да упаднат во зградата на мисијата на Европската унија, за време на протестот против плановите на земјата да го воведе еврото следната година. Антивладините демонстранти, скандирајќи „Оставка“ и „Не за еврото“, фрлаа црвена боја, петарди и молотови коктели врз зградата на ЕУ во главниот град Софија, при што ја запалија влезната врата пред полицијата да ги растера. Околу 10 полицајци се полесно повредени, а околу шест лица се приведени, изјави висок полициски функционер по протестот.

Владата го осуди нападот врз зградите на ЕУ, наведувајќи дека таквите напади „се неприфатливи и се во спротивност со принципите на владеењето на правото“. Протестите започнаа пред бугарската Централна банка, при што демонстрантите ги запалија фигурите на претседателката на Европската централна банка Кристин Лагард и други официјални лица.

Некои вееја знамиња на Бугарија, Советскиот Сојуз или Источна Германија, додека други носеа плакати на кои пишуваше „Ние не го сакаме еврото“.

„Не сакаме бугарската финансиска независност да биде уништена. Сакаме да го задржиме бугарскоиот лев. Тука сме да ја браниме нашата слобода“, изјави за медиумите Костадин Костадинов, претседател на партијата Преродба.

Новата бугарска влада, која беше изгласана минатиот месец по предвремените избори во октомври, седми во последните четири години, ја потврди посветеноста на земјата за приклучување кон еврозоната следната година. Премиерот Росен Желјазков рече дека државниот буџет за 2025 година ќе постави дефицит од околу 3%, отворајќи го патот за воведување на еврото на 1 јануари 2026. Сепак, земјата сè уште треба да ја исполни проширената цел за инфлација пред да се испита понудата на земјата.