Ние имаме многу вработени, но Министерството за образование и наука (МОН) нема капацитет за да ги извршува своите секојдневни потреби и да ги испорача услугите кон граѓаните, во овој случај училиштата и сите други образовни институции, рече денеска министерката Весна Јаневска, по потпишувањето на Меморандумот со деканот на Факултетот за информатички науки и компјутерско инженерство (ФИНКИ) во Скопје, проф. д-р Боро Јакимовски.
Со овој Меморандум, студентите на ФИНКИ од денес ќе му помагаат на Министерството во унапредување на дигиталното работење и забрзување на процесот на дигитализацијата во образованието. Според Јаневска, во процес на една технолошка ера и неопходна дигитализација на општеството која значи побрза, поефикасна услуга, но и борба против криминал и корупција, овој меморандум е од многу големо значење затоа што капацитетите на Министерството се навистина на многу ниско ниво.
„Мислам дека ова не се само слабости на МОН, ова се слабости на целата администрација во државата и јас ќе ги посочам оние кои ние ги имаме. Студентите ќе имаат можност да видат како функционира една јавна институција, односно ова Министерство, а ние од нивната помош ќе добиеме квалитетни методи, инструменти, начини и помош, реална помош на многу ретките информатичари кои ги имаме во Министерството“, кажа Јаневска.
Студентите, рече таа, под менторство на нивните професори, ќе дадат поддршка на тековното одржување на дел од информациските системи и дигитални платформи со кои располага МОН. Ќе учествуваат во креирање и имплементации на нови техничко-технолошки решенија во воспитно-образовниот процес, а со нивното знаење се очекува да се прошири и листата на дигитални услуги кои ќе им бидат достапни на граѓаните, односно на учениците, студентите, наставниците, родителите.
„Меморандумот нема временска рамка и цениме дека во иднина ќе може дополнително да се надградува во зависност од потребите и можностите на двете страни. Согласно договореното, Факултетотот ќе организира и спроведува едукативни активности во форма на обуки, работилници и семинари за стручно усовршување на вработените во Министерството, а ние ќе вратиме така што ќе дадеме можност за практично усовршување. Имам должност да ги повикам и другите јавни институции и високообразовни установи да иницираат ваков тип на соработка. Да им дадеме можност на младите да се докажуваат и практично да се надградуваат уште додека студираат и со тоа да им го поедноставиме настапот на пазарот на труд по дипломирањето“, додаде Јаневска.
Студените тоа ќе го прават во склоп на нивната секојдневна пракса, односно, вели таа, „Ќе се зголеми праксата што генерално сметаме дека е мала на сите факултети. Во сите факутети треба да се зајакне практичната работа“.
Б. НЕСТОРОСКА
