Инфекциите со туберкулоза кај децата во европскиот регион се зголемиле за 10 отсто во 2023, што укажува на потреба од итни мерки на јавното здравство за контрола на ширењето, соопшти Светската здравствена организација (СЗО).

Во европскиот регион на СЗО, кој опфаќа 53 земји во Европа и Централна Азија, се регистрирани повеќе од 7.500 случаи кај децата под 15 години во 2023 година, што претставува зголемување од над 650 случаи во споредба со 2022.

„Загрижувачкиот пораст на бројот на заболени деца со туберкулоза служи како потсетник дека напредокот против оваа болест, што може да се спречи и излечи, останува кревка“, рече Ханс Хенри Клуге, регионалниот директор на СЗО за Европа.

Тој додаде дека порастот на вкупните случаи може да се должи и на подобрени дијагнози, но би можело да биде резултат и на зголеменото прекугранично движење поради руско-украинската војна.

Децата под 15-годишна возраст сочинуваат 4,3% од сите случаи на туберкулоза во Европската Унија, покажа заедничкиот извештај на СЗО и Европскиот центар за превенција и контрола на болести. Ова покажува зголемување на случаите во оваа возрасна група трета година по ред, за што Клуге рече дека е загрижувачко сценарио.