Министерот за правда Игор Филков го нарече пратеникот Антонијо Милошоски „кусур на Груевски“ откако тој во емисија на ТВ Телма за него рече дека „има слаби перформанси и слаб придонес во областа“. Тој вели дека „сега е добар момент да се потсети јавноста дека токму тој директно учествуваше во процесот на донесувањето на штетните измени на Кривичниот законик во 2023 година, со што се спаси од одговорност за кривичното дело ,,Моќник”.
Во случајот „Моќник“, Милошоски беше обвинет за делото Злоупотреба на службената положба и овластување. Почнат од поранешното СЈО, случајот е во врска со продажба на државен имот во Општина Македонски Брод. Делото му застаре во февруари 2024, а застаре и делото на татко му Милош Милошоски во истиот случај, кој беше обвинет за Измама.
Министерот Филков е од партијата ЗНАМ, коалиционен партнер во Владата на Христијан Мицкоски, а Милошоски од ВМРО-ДПМНЕ е потпретседател на Собранието кој и во времето на Владата на Никола Груевски беше на високи државни функции.
„Јас сметам дека министерот за правда има слаби перформанси по однос на обврските коишто ги има преземено за реформите во правосудството“, рече Милошоски на телевизиското гостување, по што доцна вечерта со соопштение се јави министерот Филков.
„Кусурот на Груевски, познат под прекарот ‘Џуџето од Небрегово’, а јавноста добро го памети по аферите поврзани со АМСМ и семејните бизниси од Кичево, изгледа дека сè уште нема навика да одговара пред граѓаните кои го избрале“, соопштија од Кабинетот на Филков.
Министерот за правда го обвини Милошоски дека работи по туѓи наредби.
„Дали се тоа интересите на граѓаните или некои други агенди? Во минатото е познат по ванчомихајлистички ставови, многу лаги и невистини. Ова е лош дефокус на македонската јавност по двонеделниот ‘одмор’“, изјави Филков.
