Европскиот комесар за правда, Мајкл Мекграт, вели дека е шокиран од токсичноста и опасноста на некои производи што се продаваат на популарните кинески платформи за онлајн трговија, како „Тему“ и „Шеин“, најавувајќи построги мерки против овие компании.

Мекграт вети дека ќе се справи со продажбата на стоки кои флагрантно ги кршат законите на ЕУ, имајќи предвид дека дневно во Унијата пристигнуваат околу 12 милиони пакети со ниска вредност од трговци надвор од блокот. Тој ги очекува резултатите од тајна операција за тестирање на производите, спроведена низ цела ЕУ, која треба да ги потврди веќе собраните докази дека кинеските трговци ги заобиколуваат европските регулативи.

Меѓу најопасните примери со кои се сретнал Мекграт се цуцли за бебиња со лесно одвоиви делови, кои претставуваат ризик од задушување бидејќи ја немаат пропишаната дупка што би овозможила проток на воздух доколку бебето случајно ги проголта.

Во извештај објавен овој месец, европратениците наведоа и други опасни производи, како што се детски мантили за дожд со токсични хемикалии, очила за сонце без УВ-филтер и детски шорцеви со подолги врвки од дозволените, кои можат да предизвикаат сопнување.

Откриена е и козметика која содржи бутифенил метилпропионал, познат како „Лилиал“, супстанца која ЕУ ја класифицира како „многу загрижувачка“ и е забранета од 2022 година поради сомневања дека влијае на плодноста и развојот на фетусот. Минатата година, владата на Велика Британија ги повика потрошувачите да ги фрлат сите производи што ја содржат оваа состојка.

„Шокиран сум од ова и мислам дека имаме должност да ги заштитиме европските потрошувачи“, изјави Мекграт за „Гардијан“.

Националните власти за заштита на потрошувачите веќе испраќаат брзи предупредувања низ ЕУ за небезбедни непрехранбени производи преку системот „Safety Gate“, кој е отворен и за поплаки од потрошувачите.