Српскиот министер за јавни инвестиции Дарко Глишиќ е превезен во болница во тешка состојба откако му се слоши додека гостуваше на телевизијата „Пинк“ утрово. Министерот за здравство Златибор Лончар изјави дека Глишиќ доживеал мозочен удар.

„Му се слоши во телевизиска емисија и превезен е во болница во исклучително тешка состојба, без свест. Ќе биде применето се со што располага медицината. Ова сите не потресе“, кажа Лончар.

Глишиќ гостуваше во утринската програма на „Пинк“ кога му се слоши, по што преносот беше прекинат.

Дарко Глишиќ е еден од најблиските соработници на српскиот претседател Александар Вучиќ и висок функционер на Српската напредна партија, чиј член е од основањето во 2008. За министер за јавни инвестиции беше назначен во мај 2024.