Научниците измерија една од најмасивните црни дупки досега, која има маса еквивалентна на 36 милијарди Сонца. Оваа неверојатна црна дупка се наоѓа на оддалеченост од околу 5 милијарди светлосни години, во една од најмасивните познати галаксии.

„Ова е меѓу десетте најмасивни црни дупки некогаш откриени, а сосема е можно да е и најмасивната“, изјави Томас Колет, автор на студијата и професор на Универзитетот во Портсмут, Англија.

Црната дупка е лоцирана во системот познат како „Космичка Потковица“. Станува збор за таканаречена „заспана“ црна дупка, што значи дека таа не голта активно материја од својата околина, за разлика од активните црни дупки кои се хранат од дискот со материја што кружи околу нив. За споредба, и црната дупка во центарот на нашата галаксија Млечен Пат, Стрелец A*, е „заспана“, но нејзината маса изнесува само околу 4,15 милиони сончеви маси.

Научниците веруваат дека не е случајност што оваа џиновска црна дупка се наоѓа во толку масивна галаксија. Тимот што стои зад откритието се надева дека ќе дознае повеќе за очигледната поврзаност меѓу големината на супермасивните црни дупки и нивните матични галаксии.

„Сметаме дека големината на двете е тесно поврзана. Кога галаксиите растат, тие можат да насочат материја кон централната црна дупка. Дел од оваа материја ја зголемува црната дупка, но голем дел од неа се исфрла во вид на неверојатно светол извор наречен квазар. Овие квазари испуштаат огромни количини енергија во нивните матични галаксии, што го спречува згуснувањето на облаците од гас и формирањето нови ѕвезди“, објаснува Колет.