Американската морнарица објави дека најголемиот воен брод на светот „Џералд Форд“ пристигнал на Карибите, што следува по зачестените американски напади врз бродови кои наводно превезуваат дрога и засилените тензии со Венецуела. САД досега извеле 19 напади врз бродови во Карибите и источниот Пацифик, при што биле убиени најмалку 76 луѓе.

Венецуелските власти го обвинија Вашингтон дека измислува криза и сака да го собори левичарскиот претседател Николас Мадуро. САД ги влошија односите и со Колумбија и нејзиниот претседател Густаво Петро, кого Трамп го опиша како разбојник и негативец.

Американската морнарица кажа дека ударната група на „Џералд Форд“ влегла во зоната на одговорност на Јужната команда на САД, која ги надгледува Латинска Америка и Кариби. Групата се состои од 4.000 морнари, десетици авиони, разни пловила и лансери на проектили.

„Ова ќе го зајакне капацитетот на САД за откривање, следење и спречување на нелегални актери и активности што ги нарушуваат безбедноста и просперитетот на САД и ќе помогне во прекинувањето на трговијата со наркотици во регионот“, кажа портпаролот на Пентагон, Шон Парнел.

Групата се приклучува на значајни воени сили што веќе се распоредени во регионот, вклучувајќи илјадници војници, нуклеарна подморница и воени авиони стационирани во Порторико, што е најголемото американско воено присуство во и околу Латинска Америка во последните децении.

Во почетокот на ноември, Трамп негираше дека сака да ја собори владата на Венецуела или да започне војна.

„Секој уништен брод со дрога би убил 25.000 луѓе и би уништил семејства низ целата наша земја“, кажа Трамп.