Убиениот врховен водач на Иран, ајатолахот Али Хамнеи, е погребан во најсветиот храм во земјата, соопштија државните медиуми утрово, откако огромни толпи се собраа на неговoто испраќање, а неговиот син и наследник Моџтаба Хамнеи сè уште е скриен од јавноста. Погребот во Машад во североисточен Иран се одржа по една недела масовни погребни поворки, собири и церемонии, што се совпаднаа со обновувањето на конфликтот со САД по неколку недели примирје.

Хамнеи беше убиен во првите напади по почетокот на американско-израелската војна против Иран на 28 февруари. Тој стана врховен водач во 1989, една деценија по Исламската револуција и во следните децении ја консолидираше политичката, економската и воената моќ во својата функција.

За Иранците и светот останува мистерија каде се наоѓа неговиот син Моџтаба Хамнеи, кој беше избран за нов врховен водач во март, но не е виден во јавност откако почна војната. Иако беа објавени негови писмени изјави, досега немаше никаква фотографија, видео или гласовна снимка од него.

Тој претрпел тешки повреди во нападот во кој беше убиен неговиот татко. Извори блиски до тесниот круг на Хамнеи кажаа дека лицето му е изобличено, а нозете тешко повредени.

Високи ирански функционери изјавија дека Хамнеи заздравува, но сè уште не е доволно добро за да може да се појавува во јавност. Државните безбедносни служби, исто така, се обидуваат да ја ограничат неговата изложеност во случај на нови напади од САД.

Моџтаба Хамнеи беше назначен со поддршка на Револуционерната гарда, која сега се смета за доминантна сила во иранската политичка и стратешка мисла.