Филмот „Инк“ (Ink) на режисерот Дени Бојл, за подемот на медиумскиот магнат Руперт Мардок и уредникот на весникот „Сан“ Лери Лем, ќе го отвори Венецискиот филмски фестивал, соопштија организаторите. „Инк“ е филмска адаптација на драмата на Џејмс Греам, која го прикажува преземањето на дневниот весник „Сан“ од Мардок во 1969.

Гај Пирс го игра ликот на Мардок, а Џек О’Конел го игра Лем во филмот што ја раскажува приказната за тоа како двајцата го претвориле весникот во највлијателниот британски таблоид. Во филмот игра и Клер Фој.

„Многу пред ‘Фокс њуз’,  кликбејт-насловите и Трут соушал’, децении пред Твитер, Фејсбук, Гугл и Онлифенс, овие двајца создадоа нов таблоид кој, спротивно на сите очекувања, стана најпродаваниот весник во светот“, изјави оскаровецот Бојл и додаде дека весникот „го предизвика естаблишментот и го преобликува нашиот свет за модерната ера“.

Бојл рече дека за него е огромна чест што неговиот филм е избран за отворање на фестивалот, додавајќи: „Многупати сум бил на Биеналето, но ова е моето прво учество на филмскиот фестивал.“

„Инк“ ќе се конкуренцијата за Златен лав на 83. издание на фестивалот, кој започнува на 2 септември. Целосната листа на филмови што ќе се борат за престижниот Златен лав се очекува да биде објавена следната недела. Организаторите досега објавија дека холивудските актери Елен Берстин и Џорџ Клуни ќе добијат Златен лав за животно дело.

Театарската претстава „Инк“ имаше премиера во Лондон во 2017,  а во 2019 беше поставена и на Бродвеј, каде што беше номинирана за повеќе награди Тони и освои неколку од нив.