Секретарот на американската армија Ден Дрискол поднесе оставка по 18 месеци на функцијата. Американските медиуми објавија дека тој заминува по неколку месеци конфликт со министерот за одбрана Пит Хегсет.

Најмладиот секретар на армијата (41) често се нарекуваше „човекот за дронови“ на Доналд Трамп.

„Дрискол беше многу ефикасен во унапредувањето на агендата на претседателот Трамп да ја направиме Америка повторно силна и обезбеди извонредно лидерство за време на воените операции“, соопшти Белата куќа.

Откако влезе во Пентагон, Хегсет отпушти повеќе од десет високи воени офицери, вклучувајќи ги началникот на поморските операции и заменик-началникот на генералштабот на воздухопловните сили. Деталите за несогласувањата помеѓу Дрискол и Хегсет не се познати.

Секретар на армијата е највисокиот цивилен лидер на американската армија, кој ги води активните трупи, заедно со Националната гарда и резервните војници. Како секретар на армијата, Дрискол стана познат како „човекот за дронови“ на Трамп поради неговото прифаќање на новите технологии на бојното поле.