Партијата „Алтернатива за Германија“ (АфД) изби на првото место на денешните покраински избори во Саксонија-Анхалт, според излезните анкети, со што оваа екстремно десничарска партија се најде на прагот на преземање на власта на покраинско ниво за првпат по Втората светска војна.

АфД освои 44,5% од гласовите, додека конзервативците на канцеларот Фридрих Мерц заостануваат далеку зад нив со 18,5% (па од претходните 34%), а социјалдемократите (кои се од левиот центар) и еколошката партија „Зелени“ го надминаа минималниот праг за влез во парламентот, според излезната анкета на јавниот сервис АРД.

„Испишавме историја во оваа земја“, изјави Улрих Зигмунд, 35-годишниот водечки кандидат на АфД во Саксонија-Анхалт, кој привлече илјадници луѓе на своите предизборни собири и постојано ја претставуваше победата во покраината како прв чекор кон освојување на власта на национално ниво на сојузните избори закажани за 2029 година.

Резултатот претставува голем напредок во настојувањата на АфД да дојде на власт на национално ниво и значаен неуспех за коалициската влада на Мерц, иако останува неизвесно дали екстремнодесната партијата ќе успее да формира покраинска влада. Излезноста изнесуваше околу 76%, што е значително над нивоата вообичаени за покраински избори.

Многу работи би можеле да зависат од тоа дали левичарската популистичка партија БСВ – потенцијален коалициски партнер на АфД – исто така ќе го надмине изборниот праг. Излезните анкети покажаа дека таа се наоѓа веднаш над или веднаш под тој праг.

Копретседателката на АфД, Алис Вајдел, го поздрави „историскиот“ резултат, кој ѝ дава на партијата јасен мандат за владеење, но не беше веднаш јасно дали таа ќе може да формира влада.

Покраинскиот премиер Свен Шулце ѝ честиташе на АфД и призна дека резултатот покажува оти таа е најсилната партија.

Ако АфД не успее самостојно да владее, тоа би можело да поттикне долг процес на формирање коалиција од мејнстрим партиите, кои се решени да ја држат надвор од власта партијата што е под истрага од германската служба за внатрешно разузнавање поради десничарски екстремизам.

Програмата на АфД вклучува планови за насочување на училиштата и културните институции кон потрадиционални вредности, ограничување на имиграцијата и темелна реформа на јавниот радиодифузен сервис.