Илон Маск објави дека неговата компанија „СпејсЕкс“ ја ограничила интернет услугата Старлинк во Украина, откако украинските власти соопштија дека проблемите со поврзувањето се надминати. Милијардерот го обвини Киев дека ги прекршил правилата за користење со употреба на мрежата за воени активности, но негираше одговорност за истовремениот прекин на Старшилд, воената верзија на системот со која управуваат САД.
Официјален Киев не се огласи веднаш за најновите тврдења на Маск, додека советникот на украинскиот претседател Серхиј Бескрестнов оцени дека неговата објава е многу чудна. Маск претходно негираше дека намерно ја забавил врската во Украина, за што Киев тврдеше дека повеќе од една недела ги попречувало нивните одбранбени операции.
Проблемот се појави минатата недела за време на пошироките несогласувања меѓу Вашингтон и Киев околу украинските напади врз руската нафтена инфраструктура. Најновите коментари на Маск и нормализирањето на услугата следуваа откако американскиот претседател Доналд Трамп изјави дека му рекол на сопственикот на „Тесла“ и „Икс“ да ја врати мрежата во функција, иако претходно повеќепати негираше дека му дал насоки за нејзино ограничување.
Маск во саботата на социјалната мрежа Икс напиша дека употребата на комерцијалниот цивилен сервис Старлинк за офанзивни напади со дронови во кои се убиваат луѓе никогаш не била и не треба да биде дозволена. Според него, украинската армија ги прекршила условите за користење за изведување такви напади, па тој пропуст бил затворен минатата недела.
Тој додаде дека „СпејсЕкс“ направил повеќе за одбраната на Украина од која било приватна компанија во светот и повтори дека Старшилд е посебен систем под контрола на американската влада, која сама одлучува како ќе постапува со него. Во подоцнежна објава, Маск наведе дека Старлинк може да се користи за воена инфраструктура, но не и за недвосмислено офанзивни напади кои би ја направиле мрежата легитимна цел за возвратен удар.
Украина ги користи и цивилниот сервис Старлинк и побезбедниот Старшилд во зависност од потребите за комуникација, при што двата система работат преку мрежи од сателити во ниската Земјина орбита лансирани од „СпејсЕкс“. Старлинк им овозможува на воените единици да се координираат на бојното поле, особено во оддалечените области, додека преку Старшилд украинските оператори на дронови ги гледаат целите во реално време и управуваат со дронови пресретнувачи. Русија нема овластување да го користи Старлинк, па кога Украина испраќа ракети или дронови со долг дострел длабоко на руска територија за да гаѓа нафтени рафинерии, мрежата не функционира.
Украинскиот министер за одбрана Јевхениј Хмара претходно во саботата соопшти дека армијата повторно бележи стабилна врска и дека дроновите сега можат да постигнуваат брзини од над 400 километри на час. Киев претходно информираше дека врската се прекинувала при брзини над 161 километар на час. Украинскиот претседател Володимир Зеленски на Телеграм потврди дека брзините повторно се на потребното ниво.
