Родителите на деца со посебни потреби, кои заедно со своите деца трет ден кампуваат во паркот Жена Борец, досега собраа околу 2.000 од потребните 10.000 потписи за да поднесат иницијатива до Собранието за измена на повеќе закони, со кои ќе им се олесни животот.
Тие бараат измена на повеќе закони и подзаконски акти, со кои полесно ќе можат да ги остварат правата на нивните деца за соодветна здравствена и социјална заштита. Велат дека од многуте проблеми со кои се соочуваат, би ја издвоиле онаа со старосната граница од 26 година, односно кога лицето со посебни потреби ќе ја наврши оваа возраст нема право на посебен додаток, ниту на бесплатни лекови.
„Границата од 26 години очекуваме да ја избришат, бидејќи со тоа се прави дискриминација. Попреченоста не минува по навршување на оваа возраст, а на овие лица и нивните семејства животот им станува уште потежок. Бараме да се изедначат по правата биолошките родители на лица со посебни потреби, со згрижувачките семејства, бидејќи сега како што се поставени законите, згрижувачките семејства добиваат паричен надомест од државата, а биолошките родители не добиваат“, вели Сузана Сотјановска, од здружението „Трисомија 21“ и мајка на дете со Даунов синдром.
Приоритетно барање е укинување на старосната граница од 26 година, односно кога лицето со посебни потреби ќе ја наврши оваа возраст нема право на посебен додаток, ниту на бесплатни лекови. – Од денешното собирање потписи во кампот пред Собрание на родителите на деца со посебни потреби (Фото: СДК.МК)
Родителите на деца со посебни потреби велат дека еден од најгорливите проблеми со кој се соочува секој родител на дете со посебни потреби е што ќе се случи со овие деца по смртта на родителот. Тие објаснуваат дека имаат предлог како може да се реши ова прашање, бидејќи сега децата со посебни потреби откако ќе им починат родителите, најчесто завршуваат во психијатриските установи во Бардовци и во Демир Капија, што според родителите не е соодветно решение.
„Ги нудиме нашите имоти, ги нудиме нашите животи и ние како волонтери во партнерски однос со институциите да се обезбеди иднина и грижа за нашите деца. Има родители на деца со посебни потреби, кои се многу болни и што ќе биде со тие деца, кога нивните родители ќе починат. Кога ќе починеме јас и мојата сопруга роднините ќе си го разделат имотот и моето дете ќе заврши во Демир Капија или во Бардовци, а нашите деца не се за таму. Работиме на проект со европски пари да изградиме центри, пофункционалните деца и возрасни со посебни потреби да не бидат во центри, туку да живеат самостојно во станови со припомош“, рече Зоран Мијалков од здружението на лица со аутизам „Сплотени Срца“, кое го организираше тридневниот протест со шатори спорти Собранието.
Тој најави дека секој месец од 20 до 22 со своите деца ќе кампуваат пред Собранието додека политичарите и носителите на јавни функции не ги решат нивните проблеми.
Стојановска рече дека од следниот месец во секој град ќе отворат тетратки за собирање потписи за иницијативата за измена на законските решенија.
„Денес буквално дојдоа сите, и граѓани и претставници од сите политички партии и сегашни и поранешни пратеници и се потпишаа на иницијативата. Се надевам дека ќе ги собереме потребните потписи“, рече Стојановска.
