Попладнево Брегалница поплави делови од пешачката патека кај населбата 8 Ноември во Штип, а долж течението на реката од браната Калиманци до градот поплавени се голем број ниви и бавчи, при што водата навлезе и во повеќе домови во селата кои гравитираат кон Брегалница.

Жителите од оваа штипска населба и од населбата Ново Село стравуваат да не се повтори 2013 година, кога Брегалница го загрози стариот камен мост на реката изграден уште во турско време, а водата навлезе и во Градскиот стадион, каде што ги поплави целиот терен и околните атлетски патеки. Општиските власти засега смируваат дека овие состојби се резултат на неколкудневните врнежи од дожд по целото течение на реката, чиј водостој е најголем во Ново Село.

„Од 2,40 метри утрово, водостојот попладнево наеднаш се зголеми на 2,62 мтри. Ова ниво сѐ уште не е толку опасно, затоа што кога беа големите поллави во 2013, нивото на реката беше 4,13 метри. Згора на тоа, врнежите во регионот престанаа, па се очекува во текот на ноќта нивото на водата во Брегалница да се намали“, вели Киро Маџунаров, кој повеќе од половина век го следи и мери водостојот на Брегалница.

Т. ЈОВАНОВСКИ