Во Македонија 31 процент од девојчињата на 15-годишна возраст се чувствуваат осамени, а тој процент во Европа и Централна Азија е 28, се вели во Студијата за однесувањето поврзано со здравјето кај децата од училишна возраст. Се спроведува секоја четврта година во 51 земја од Европа, Северна Америка и Русија. Истражувањето е на Центарот за психосоцијална и кризна акција-Малинска во партнерство со Филозофскиот факултет при УКИМ, Универзитетот во Тетово и Општина Велес.

„Трендот во последните осум години, низ три истражувачки циклуси од 2014 до 2022 година, ја покажува истата насока меѓу родовите и меѓу возрасти, со високи сличности. Тоа укажува на висока чувствителност на децата на општествените случувања и услови во кои живеат, независно дали се работи за социјална, политичка или здравствена криза и несигурност. Чести нерасположенија, речиси секојдневно, во последните шест месеци, пријавиле 57 отсто од девојчињата на 15 години. Од психосоматски тегоби – болки во стомакот, главоболки, вознемиреност, раздразливост, проблеми со спиењето и концентрацијата, страдаат шест од десет девојчиња на 15 години“, се вели во студијата.

Подкастот на оваа тема со психологот Иван Христов може да го погледнете тука:

Истражувањето, било спроведено на 5.132 ученици, меѓу нив и ученици од неколку основни и средни училишта од Велес. Тоа покажало дека секое второ девојче на возраст од 15 години, изминатата година се чувствувала тажно и безнадежно, без малку секој ден во текот на две или повеќе недели. Анкетата покажала дека и задоволството од животот опаѓа со возраста од 11 до 15 години, кај девојчињата многу побрзо отколку кај момчињата. Резултатите од истражувањето покажуваат дека менталното здравје е алармантно кај учениците во средно образование. Тоа бара вклучување и присутност на родителите во нивниот живот.

П. ПЕЧКОВ