Со средства од Европската унија ќе се реконструира зелениот пазар во Куманово. Парите се обезбедени преку проект за меѓугранична соработка помеѓу општините Куманово и Гњилане. Вкупна сума на проектот е 324.766,11 евра, по приближно 50 отсто за секоја од двете страни.

Во општина Куманово е предвидена реконструкција на второто ниво на зелениот пазар со еколошки и енергетски решенија, поточно замена на азбестните плочи од кровната конструкција, замена на подните плочки и реконструкција на тоалетите. Инвестицискиот дел изнесува 89.000 евра без ДДВ.

Проектот опфаќа и обуки за земјоделците во двете општини, организирање на мобилни пазари и прекугранични недели за заеднички настап на пазарите.

„Средствата се грант од Европската унија за реконструкција на зелените пазари во Куманово и Гњилане. Проектот ќе трае 18 месеци“, изјави градоначалникот Максим Димитриевски.

Имплементацијата ќе стартува во првата половина на јануари годинава, по изборот на проектен тим и изведувач на работите.

Проект за меѓугранична соработка помеѓу Македонија и Косово ќе се реализира и во општините Крива Паланка и Витина, за изградба на пешачки патеки и шеталиште покрај Крива река и Морава, уредување на спортски терени и заштита на животната средина.

Градоначалниците на двете косовски општини со нивните македонски колеги пред Нова година ги потпишаа договорите за реализација на проектите од меѓугранична соработка.

С. НИКОЛИЌ