„Кој ве повика“, им рекоа во полициската страница во Демир Хисар на директорката на Гимназијата Маја Лозановска и на нејзиниот адвокат Жаре Стевановски, кои утрово се јавија на информативен разговор.

Стеваноски рече дека им рекле случајот да се води како самите да се пријавиле, но тие го одбиле тоа укажувајќи дека и при претресот во петокот, а и подоцна на телефон биле повикани на информативен разговор при што кажале дека во вторник ќе се јават во станицата.

Сега се повикани утре, 13 август, пак да дојдат во полиција на разговор.

Тие поднесоа и кривична пријава за самовластие, зашто директорката Лозановска уште не добила решение за разрешување, а новоназначената влегла во училиштето. Стеваноски вели дека по решение од Централен регистар Лозановска уште е директорка.

На 8 август вечерта, полицијата направи претрес во домот на Лозановска барајќи го печатот од училиштето. Таа во тој период беше на боледување, а полицискиот началник рече дека и на носилки ќе ја однесе на информативен разговор иако имаше налог само за претрес, а не и за нејзино лишување од слобода. Од МВР покренаа дисциплинска постапка против началникот, а за случајот соопштија дека против директорката имало пријава и постоеле основи на сомневање за кривично дело Одземање печат и службени документи.

Четири дена претходно, градоначалникот ја имаше разрешено Лозановска, како што рече по налог на Просветниот инспекторат поради неправилности во работењето. Но, адвокатот Стеваноски изјави дека целта била да се назначи новата в. д. директорка која ќе ги заврши трите вработувања пред распишување на локалните избори, кои преседателот на Собранието Африм Гаши ги распиша на 9 август, а ќе се одржат на 19 октомври.

• ПОЛИЦИСКИОТ НАЧАЛНИК ОД ДЕМИР ХИСАР ЌЕ СИ СНОСИ ПОСЛЕДИЦИ, НО ДА НЕ ЈА АМНЕСТИРАМЕ И ДИРЕКТОРКАТА НА ШКОЛОТО КОЈА РАБОТИ СПРОТИВНО НА ЗАКОН, РЕЧЕ МИЦКОСКИ
• ПОЛИЦИЈАТА ВО ПРИДРУЖБА НА БРЗА ПОМОШ ИЗВРШИ ПРЕТРЕС КАЈ ДИРЕКТОРКА НА ГИМНАЗИЈА ВО ДЕМИР ХИСАР, НАЧАЛНИКОТ БАРА ДА ЈА ОДНЕСАТ НА РАСПИТ НА НОСИЛКИ
• ПРЕД РАСПИШУВАЊЕ НА ИЗБОРИТЕ САКАА ДА ЈА РАЗРЕШАТ ДИРЕКТОРКАТА НА УЧИЛИШТЕТО ВО ДЕМИР ХИСАР, ВЕЛИ АДВОКАТОТ, А ГРАДОНАЧАЛНИКОТ ОДГОВАРА ДЕКА ПОСТАПУВАЛ ПО РЕШЕНИЕ НА ПРОСВЕТЕН ИНСПЕКТОРАТ
• ДИРЕКТОРКАТА НА ГИМНАЗИЈАТА ОД ДЕМИР ХИСАР ВО ВТОРНИК ЌЕ ОДИ НА ИНФОРМАТИВЕН РАЗГОВОР ВО ПОЛИЦИЈА, НО СО АДВОКАТОТ ЌЕ БАРААТ ДА СЕ КОНСТАТИРА КОЈ ПРОВАЛИЛ ВО УЧИЛИШТЕТО ДЕН ПРЕД РАСПИШУВАЊЕ НА ИЗБОРИТЕ
• ДИСЦИПЛИНСКА ЗА НАЧАЛНИКОТ КОЈ НА НОСИЛКИ САКАШЕ ДА ЈА НОСИ ДИРЕКТОРКАТА НА ГИМНАЗИЈАТА ОД ДЕМИР ХИСАР ВО ПОЛИЦИЈА, МВР МУ ПРОГНОЗИРА РАЗРЕШУВАЊЕ

Ж. ЗДРАВКОВСКА