„Порше лизинг“ ДООЕЛ Скопје и „Порше Македонија“ ДООЕЛ Скопје се независни правни субјекти и ниедно лице од „Порше Македонија“ не можеше да влијае врз предметната набавка по било кој основ, одговори „Порше лизинг“ од каде Општина Битолна со оперативен лизинг набави 5 возила, на нашето прашање дали е дел од групацијата „Порше“, чиј генерален директор е роднина на Тимчо Муцунски, министер од Владата на ВМРО-ДПМНЕ, партија од која исто така е и локалната власт во Битола.
„’Порше лизинг’ ДООЕЛ Скопје и ‘Порше Македонија’ ДООЕЛ Скопје се членки на ‘Порше Холдинг Групацијата’ од Салцбург, но се независни правни субејкти во Македонија. ‘Порше лизинг’ беше учесник на наведениот тендер самостојно, без други членови на групата понудувачи и без влијание од кое било друго лице кое не е вработено или одговорно лице во ‘Порше лизинг’ ДООЕЛ Скопје. ‘Порше лизинг’ дури ни набавката на овие возила дадени преку оперативен лизинг не ја изврши од ‘Порше Македонија’, така што ниедно лице од ‘Порше Македонија’ не можеше да влијае на предметната набака по било кој основ“, одговори компанијата по еден ден откако ѝ беа поставени прашањата и по објавувањто на текстот.
САКАМДАКАЖАМ.МК на 28 февруари објави текст дека опозицијата во Битола тврди оти служебните возила Општината ги набавила од фирма на роднина на владин функционер, а дека општинските власти велат дека набавката била на јавен тендер и било постапено законски без никакви влијанија. Текстот беше објавен во петокот (28.02.2025) по 14 часот, а нашите прашања до „Порше лизинг“ беа доставени на 27 февруари во 18.12 часот. Бидејќи до објавата на текстот не добивме одговор, тоа така прецизно и го наведовме. Нивниот одговор стигна два часа по објавата на текстот на 28 февруари, односно во 16,30 часот, по завршувањето на работниот ден.
На 27 февруари, претседателот на битолскиот огранок на СДСМ, Методија Куновски, изјави дека добавувач на возилата е фирмата „Порше лизинг“, дел од групацијата „Порше Македонија“ каде генерален директор е роднина на министерот за надворешни работи, Тимчо Муцунски, па побара од Државната комисија за спречување на корупција (ДКСК) да ја провери постапката.
Министерот за надворешни работи Тимчо Муцунски во реакцијата до нашата редакција, неколку часа по објавениот текст на 28 февруари, истакна: „Златко Муцунски, со кого имам роднинска врска, е управител на компанијата „Порше Македонија“, но нема никаква правна поврзаност со компанијата „Порше лизинг“. Ова може лесно да се потврди преку официјалната документација достапна во Централниот регистар“.
Од Општина Битола, пак, ни одговорија дека постапката за јавна набавка е спроведена согласно законската регулатива, при што Комисијата за евалуација немала обврска да навлегува во сопственичката структура на компанијата, за да утврди некаква евентуална роднинска поврзаност на некој функционер.
„Согласно објавениот оглас за спроведување на постапка за јавна набавка на 01.08.2024 година, Општина Битола, на 27.09.2024 година, склучи договор со ‘Порше лизинг Скопје’ за набавка на моторни возила преку оперативен лизинг по спроведена постапка за јавна набавка. Потписникот на договорот за ‘Порше лизинг’ е лицето Ф. С., а овие податоци лесно и едноставно може да се добијат од системот за јавни набавки. Ниту една фирма, а во случајот ниту ‘Порше лизинг’ не била ставена во повластена положба при спроведување на постапката за јавна набавка и евалуација на доставените понуди од економските оператори“, ни одговорија од Општина Битола.
САКАМДАКАЖАМ.МК уште во септември лани објави дека Општина Битола набавува возила преку оперативен лизинг и дека по истекот на договорот и платени 160.000 евра ќе ѝ ги врати на фирмата. Вкупно за петте возила месечно ќе се плаќа лизинг од 2.837,85 евра или безмалку 3.000 евра.
Ж. ЗДРАВКОВСКА
