Откако изминатава седмица сериозно се намали бројот на пациенти позитивни или сомнителни на ковид-19, физикалното одделение во велешка болница е празно. Тоа нема да прима пациенти. Пациентите позитивни или сомнителни на ковид-19 сега се сместуваат само на Инфективното одделение, кое има 54 кревети.

„На Одделот за физикална терапија и рехабилитација, кој е наменет како ковид центар, моментално немаме хоспитализирани пациенти и е ставен во времено мирување. Позитивните случаи се примаат во Инфективното одделение, додека сомнителните или негативните кои имаат здравствени проблеми се на Интерно одделение“, кажа д-р Елеонора Јованова, портпарол на Општа болница Велес.

Моментално во велешката болница има 39 пациенти, од кои 32 се потврдени позитивни, непотврдени двајца и пет со негативен тест, но задржани на болничко лекување. На кислородна поддршка се 11 пациенти. На Инфективно се 33, а на Интерно шест пациенти.

П. ПЕЧКОВ