Надојдената Маркова Река предизвика големи оштетувања на пругата помеѓу Скопје и Велес, на делница Лисиче-Драчево. Проценките на стручните лица од Македонски железници се дека е однесен нанос каде е поставената пруга во должина од стотина метри. Овие оштетувања нема да го сопрат железничкиот сообраќај, но ќе има зголемено времетраење на патувањето, најавуваат од Македонски железници.

„Штетите се големи, наносот каде е поставена пругата е однесен во должина од околу стотина метри. Возовите на оваа релација ќе ја користат пругата преку Трубарево, што значи дека нема да има прекин, но патувањето ќе трае подолго. Можно е некој воз да биде времено сопрен“, соопштија од Македонски железници.

Претпладнево жеелзничкиот сообраќај од Скопје кон Велес и обратно се одвива непречено, но со задоцнувања на патничките возови.

Голем број куќи и деловни објекти синоќа се поплавени по излевањето на Маркова Река во Општина Студеничани, Скопско. Како што соопшти Центарот за управување со кризи (ЦУК), поплавени се селата Студеничани, Батинци, делови од Пинтија и Горно Лисиче.

„Поради врнежите од дожд, во текот на доцните попладневни и вечерните часови, дојдено е до зголемување на нивото на Маркова Река поради што истата е излеана преку мостот кај населеното место Љубош и низводно, и дојдено е до поплавување на неколку куќи, магацини и индустриски објекти во селата Студеничани и Батинци, како и делови кон Пинтија. Исто така, пријавено е и поплавување на дел од булевар Борис Трајковски кај населба Пинтија, каде исто така имало пријави за поплавени магацини. Во текот на ноќта, на Единствениот број за итни повици 112 добиени се и пријави за поплавени куќи во Горно Лисиче во Општина Аеродром“, соопшти утрово ЦУК.

Сè уште непроодни се локалниот пат од село Горно Лисиче кон село Долно Лисиче и првиот мост во село Батинци. Поради поплавите, железничкиот патнички и товарен сообраќај од 22:50 часот е во прекин во правец на Лисиче и Драчево и обратно, додека патничкиот сообраќај се одвива преку станицата Трубарево.

П. ПЕЧКОВ