Камерниот оркестар на Битола, кој повеќе од десет години успешно функционира, a од 2024 има статус на национална установа, годинава е соочен со недостиг од основни ресурси за функционирање, рекоа од раководството.

„Немаме простор за проби, а и финансиските средства се далеку од потребните за непречено одвивање на активностите”, вели в. д. директорот на Оркестарот, Дејан Цветковски.

Од Оркестарот додаваат дека Министерството за култура оваа година им одобри само четири проекти, што е речиси десет пати помалку во споредба со другите нивни колеги од Скопје.

„За жал, поради овие ограничувања, за останатите наши планирани настани и проекти во 2025 ќе мора да се потпреме на сопствени средства, преку продажба на влезници и барање спонзорства“, додаде директорот.

Од Оркестарот велат дека ги започнуваат подготовките за претстојната музичка сезона со засилена енергија и нови кадри. По дополнителните вработувања, активно работат на планирањето на програмата.

„Соочувањето со проблемите со простор и финансии предизвикаа отежнато планирање на концерти, што дополнително го комплицира нашето функционирање во моментов. Се надеваме дека за овие проблеми Министерството за култура и туризам ќе има слух и со нивна поддршка, како што е поддршката која што ја даваат на националните установи од овој вид ќе можеме успешно да ги реализираме амбициозните планови за годинава“, велат од Оркестарот.

Камерниот оркестар од Битола е широко признат и популарен не само во Македонија туку и во странство по својот уникатен начин на работа и микс на класична и популарна музика. Минатата 2024  одржаа концерти во Рим, Виена и во Врање, каде ги исполнија салите до последно место. Неодамна, Оркестарот беше на посета кај претстедателката Гордана Сиљановска-Давкова која рече дека тие се културен стожер кој придонесува кон зголемување на културното богатство во регионот.

Ж. ЗДРАВКОВСКА