Откако минатата година сега покојниот градоначалник на Охрид Јован Стојаноски со партнери од ЕУ го најави враќањето на реката Сатеска во старото корито, со што би се елиминирал најголемиот загадувач на Охридското Езеро, сега веќе никој не го спомнува овој проект. Барем досега, и кандидатите за градоначалник не кажаа што планираат со овој проблем.

Од локалната самоуправа во Охрид велат дека Сатеска во овој момент не била приоритет. Проектот што лани беше најавен и натаму е актуелен, но се чекал погоден момент повторно да се актуелизира.

Раководителот на Секторот за соработка на делегацијата на Европската унија Никола Бертолини во септември кажа дека овој проект е посебно важен за заштитата на животната средина.

„Овде, во регионот на Охрид и Струга, наидовме на одлична комбинација на локална посветеност со интернационална поддршка. Многу често помагаме вакви проекти, затоа што животната средина е исклучително важен сегмент во животот на граѓаните. Ова е вистински одговор на вакви прашања”, кажа Бартолини.

Според достапните податоци, со политичка одлука од 1961 година, без да се води сметка за загадувањето на Охридското Езеро, Сатеска наместо да се влева во Црн Дрим, беше пренасочена на ново корито. Оттогаш се влева во езерото. На вливот со години се гледа како Сатеска носи тони ѓубре и друг отпаден материјал. Во изминативе децении имаше неколку најави дека оваа река ќе се врати во старото корито, но поради недостаток на средства, отсуство на еколошка свест, но и поради потребата езерото да има повеќе вода за производство на електрична енергија, тоа се одложуваше.

Д. ЧУБРИЌ