На вонредна седница одржана онлајн вчера доцна попладне, Советот на Општина Тетово со мнозинство гласови донесе Програма за празнично украсување на градот за претстојните новогодишни празници. За оваа цел Општината издвои 1.500.000 денари или речиси 25.000 евра. Оваа програма претставува измена и дополнување на Програмата за активности на Општина Тетово во областа на културата за 2025 година.

„За оваа програма ‘за’ гласаше советничкото мнозинство составено од Коалицијата Вреди и ВМРО-ДПМНЕ, додека против беа советниците од коалицијата НАИ. Воздржани беа советниците од Подобро за Тетово, Левица и СДСМ. Со оваа одлука, Општина Тетово ја потврдува намерата градот да добие празничен сјај за крајот на 2025 година“, информира претседателот на Советот, Јусуф Абдули.

Во последните години од вториот мандат на поранешната градоначалничка Теута Арифи и за време на целиот прв мандат на актуелниот градоначалник Билал Касами, улиците и градскиот плоштад не се украсуваа за новогодишните празници со истото образложение, дека општината немала пари за оваа намена.

З. АНДОНОВ