Основното училиште „Светозар Марковиќ“ во Старо Нагоричане доби систем за парно греење од Јапонската амбасада. Донацијата вредна 53.000 евра е во рамките на јапонската програма за мали грантови и ова е прв ваков проект во оваа мала општина, а 18. во регионот.
„Среќен сум што овој проект успешно се реализира и со тоа ги подобривме условите за учење не само за сегашните, туку и за идните генерации. Со градоначалничката заклучивме дека има простор за натамошна соработка“, кажа јапонскиот амбасадор Савада Хиронори.
Од 1996 година, Јапонија поддржала 158 проекти во Македонија со вкупно 7,8 милиони евра. Од нив, 57 се во здравството, 70 во образованието и 31 во животната средина.
„Како градоначалничка и мајка знам колку е важно детето да учи во топла и пријатна училница. Наставниот кадар доби квалитетни услови за работа, а родителите можат да бидат спокојни за своите деца додека се на училиште“, кажа градоначалничката на Старо Нагоричане, Жаклина Јовановска.
Системот за парно греење работи на нафта и ќе ги замени старите ќумбиња, со кои се затоплуваа со години наназад.
Во основното училиште „Светозар Марковиќ“, каде што наставата се изведува на српски јазик, учат околу 100 деца од Старо Нагоричане и околните села.
С. НИКОЛИЌ
