На денешниот собир на пензионерите во Штип беше побарано зголемување на отпремнината за починат пензионер од 35.000 на 50.000 денари, како и неотповиклива оставка на претседателката на Сојузот на пензионерите Станка Трајкова и поради нејзината неотчетност за тоа каде се трошат нивните пари. На протестот присуствуваа пензионери од десетина градови во Македонија меѓу кои и пензионери од Скопје и од Струга. Беше речено дека интерес пројавиле и од други здруженија, но поради немање на средства за патување го откажале присуството.

„Бараме да нема таков драстичен распон на минималната пензија од 14.000 денари со минималната плата која е двојно повисока. Исто така, процент од нашата членарина треба повратно да се враќа во нашите здруженија кои ќе бидат наменети за активност, а отпремнината за починат пензионер од сегашните 35.000 денари да се зголеми на 50.000 денари“, побараа пензионерите кои, како што рекоа, уште го чекаат одговорот од Сојузот на пензионерите и надлежните институции дали и колку средства се одлеваат на пензионери во Косово.

Трајче Станојков, пензионер од Свети Николе, Добре Илиевски пензионер од Гази Баба, Живко Михајлов од Општина Конче и Трајче Митев од Штип, поради игнорантскиот однос кон нив од Трајкова уште еднаш побараа нејзина неотповиклива оставка, демократски избор на нов претседател со учество на сите здруженија на пензионерите, а не како досега со политичко назначување.

Т. ЈОВАНОВСКИ