По шестгодишна пауза, во водите на Охридското Езеро повторно се прави вештачки мрест на охридската пастрмка. Во Хидробиолошкиот завод – Охрид собрани се 660 илјади зрна оплодена икра. Одгледувањето на подмладокот од охридска пастрмка во мрестилишните и одгледувачки капацитети на Заводот ќе се одвива во текот на целиот онтогенетски развиток, како и целиот период на растење со прихранување до порибување.

„Со риболовот за научно-истражувачки цели беа уловени вкупно 425 единки, од кои 278 женски и 147 машки. Единките по извршениот вештачки мрест (молзење) беа вратени во водите на Охридското Езеро на 2 километри оддалеченост и длабочина од 150-200 метри од местото каде беа уловени, за да се овозможи нивно понатамошно учество во процесот на репродукција во идните години. Колекционирани се, оплодени и поставени 660.000 зрна икра во мрестилишните инсталации на Хидробиолошки завод – Охрид, а кои моментно се во период на инкубација и оплодената икра од првиот риболовен ден започна со излупување овој викенд“, вели Душица Илиќ-Боева од Хидробиолошкиот завод.

Илиќ-Боева кажува дека прихранувањето на подмладокот ќе се одвива во тек на шест месеци, а порибувањето на одгледаниот подмладок од охридска пастрмка, со просечна тежина од 3 грама и просечна должина од 70-90 милиметри ќе се реализира во периодот на есенскиот врв на зоопланктонот во Охридското Езеро, и тоа на истите локалитети каде биле уловени матиците за колекционирање на икрата и млечта од кои е добиен подмладокот.

Порибувањето на Охридското Езеро е една од активните мерки за заштита како на охридската пастрмка, така и на природната рамнотежа помеѓу видовите во Езерото, затоа што како предаторски вид риба, ако бројноста на нејзината популација се намали под биолошкиот оптимум, се нарушува екосистемскиот еквилибриум. За спроведување на овој процес постојат три мрестилишта на Охридското Езеро, најстарото од 1935 во Хидробиолошкиот завод, мрестилиште во селото Шум кое почнало со работа од 1960 и третото кај Полуостровот Трепет во село Лин, Албанија. Процесот е билатерален прекуграничен, и оваа година сите три мрестилишта се активни во одгледување на подмладок за порибување на Охридското Езеро.

„Пастрмките се видови – индикатори на чиста незагадена средина, но со влијанието на човекот со нарушување на хабитати – рибни плодишта, бука од огромен број моторни чамци, цврст отпад, присуството на ‘мрежи духови’, климатските промени, а воедно притисокот кој со децении се врши на пастрмските видови како најбарани поради квалитетот на нивното месо, а со тоа и нивната цена, постојат нарушувања во популацијата со отсуство на одредени должински класи, нарушување на соодносот помеѓу пастрмките и краповидните риби, со поместување во исхраната од доминантно користење на зоопланктон кај двата вида пастрмки на доминантно користење на фауната на дно, како резултат на компетицијата со плашицата која со децении речиси не се лови, како кај нас така и во Албанија, таа станува пораширена, побројна во ареалот и ги приморува пастрмките да бараат извор на храна во фауната на дното“, велат од Хидробиолошки завод.

Од 2004 до 2012 имаше тотален мораториум на риболовот од македонска страна, но мора да постои реципроцитет од другата страна на границата бидејќи, како што велат експертите, за рибите не постојат граници во Езерото.

Вештачкиот мрест на охридската пастрмка се спроведува од 1935, со исклучок на две години за време на Втората светска војна како и во текот на изминативе шест години.

С. ВРЕНЦОВСКА